فشّة خلق

الله يلعن هالحالة يلي وصلنالها، يلي فيها لي بيتديَن تا يتاجر بكل شي عندو، بيمشي حالو وبصير باللوج، ويلي ما بطيق الدَين بيضلو مديون طول حياتو !

الله يلعن هالحالة يلي فيها لي بيطول لحية أو لسان وبيحكي وبيلعب عا عواطف الناس بتنسمع كلمتو وبصير قديس، ويلي بيحكي كلمتو بالمنطق والعقل باختصار بصير إبن ... !

الله يلعن هالحالة يلي فيها لما الواحد بدو يسلّم على انسانة باحترام، بقلها يا حجة بلا ما يقلها يا ست او يا مدام !

الله يلعن هالحالة يلي فيها يلي بحب وبيعشق باحترام بفوت بالحيط، ويلي بيعمل السبعة وذمتها بصير عاشق رومنطيقي!

الله يلعن هالحالة يلي فيها لي عندو مبادئ وقيم يُعتبر أهبل، ويلي بيطرّف وبيطرّف وبيطرّف، الناس بتموت بمبادئو، مع إنو عاطول بلفلف على كل شي فيه مبادئ !

الله يلعن هالحالة يلي وصلناها، يلي فيها لي بيكدح بالحياة بهالبلد وبيشتغل بعرق جبينو ما فيه يعيش بهالبلد، ويلي حاطط مكيّف 24/24 ساعة والمصاري بتوصل لتحت ط...، عايش عا ضهر لي بيكدحو  وعا ضهر البلد!

الله يلعن هالحالة يلي فيها السياسي يلي بيخترع قانون طائفي جديد وبعين وقحة ممنوع حدا يحكيه كلمة، أما لي بطالب بقوانين مدنية وبزواج مدني يُعتبر عم يمس بالسلم الاهلي وبوطن التعايش !

الله يلعن هالحالة يلي وصلناها، يلي فيها لي بيتهيج وبيحمل سلاح على الدولة بتضلها الدولة لاحقتو عم تراضي فيه وبتبسلو راسه وإجريه، ويلي بِسالم الدولة وبقلها "يا دولتي إنت مسؤولة عني" بتلعن الدولة كـِ... اختو !!

الله يلعن هالحالة يلي وصلناها، إلي فيها الأزعر بينضربلو سلام وحساب، والاَدمي بينبزق عليه وبيندعس عا رقبتو !

الله يلعن هالحالة يلي وصلناها، إلي فيها صار الايمان بـ الله ما بكون الا بالعدّ وبالحسابات وبالتزعبر، ويلي بصلّي بقلبو بصير كافر، ما المفترض يكون الله اذكى من انو ينضحك عليه!!