مذكرات أولى أيام ثورة 17 تشرين 2019 في لبنان: (بوستات فايسبوك)

19 تشرين الأول 2019:

كمان الساحة إلنا اليوم

#الشعب_ينتفض

20 تشرين الأول 2019:

الناس يلي عم ينزلوا على المظاهرات موزعين برأيي على 3 فئات:

1- 20% من المتظاهرين صرلا زمان بتصرخ وبتقول #كلن_يعني_كلن وعارفي من زمان أصل المشكل وعم تحاول تتجنب اغلاط الماضي وتفكر كيف يستمر الحراك وما ينطفي متل لي قبلو.

2- فئة تانية فقيرة اوعاطلة عن العمل وقرفانة، نزلتها عفوية، عم تجرب تعبّر بحرية لأول مرة وتحلم يالتغير، بس مش عارفي شو بدا تعمل بكرا وبشو لازم تطالب، وبتشكل تقريباً 50%.

3- فئة تالتة بعد ما ضهرت عاطفيا من زعمائها بس شاركت بالمهرجان او بالاشتباك مع القوى الامنية او بمسيرة الدراجات ونسبتها 30%.

النتيجة، إنو طابور خامس ما في، وهودي لتلات فئات بِـ ضلوا احلى من الحزبيين النايمين بانتظار قرارات الزعما المفلسين، .. وبرأيي اذا جمعت الفئة الاولى والتانية قوتها عا اهداف محددة وواضحة: وهيدا شوي صعب لان الحراك عفوي، ممكن يستمر الحراك وبلكي بينخلق التغيير... بس الاكيد انو الاكثرية الصامتة بطلت صامتة #لبنان_ينتفض

22 تشرين الأول 2019:

كل ما في الأرض والسماء وأعماق المحيطات هو للوطن، والوطن لبضعة لصوص
#محمد_الماغوط
#لبنان_ينتفض #كلن_يعني_كلن #ثورة_لبنان

23 تشرين الأول 2019:

بعد المتابعة والمراقبة:

- النظام الطائفي ما عارف بمين بدو يبلش يضحي، فبلش قبل امبارح بالضرائب عالمصارف ومكمل اليوم بالبميقاتي، وبعد عندو كتير وراق

- تلفيزيون المنار صرلو من امبارح ببث من خلال كل شي اعلامي سياسي لجماهيرو، إنو اعطوا فرصة للحكومة تطبق بيان مجلس الوزراء، بس بعدوا ما عم يأثر على يلي نزلوا وبقيوا لمبارح بالحراك لحديت هاللحظة

- القوات ضهروا من الحكومة ويا ريتهم بقيوا

- النظام بدو أدوات ليوقف بوج يلي عم يصير، ولو حرق ورقة الجيش

- الحراك ما عندو وسيلة تا يكون فعّأل الا استمرار التظاهرات وقطع الطرقات، وهيدي بدها نفس طويل
#كلن_يعني_كلن #لبنان_ينتفض

24 تشرين الأول 2019:

رئيس الجمهورية أكد بخطابه إنو بهيدا النظام المبني عا توافق زعما الطوايف ومصالحهم، ما بينعمل فيه إصلاح وهو ما قدر يعمل فيه إصلاح.

هيدا النظام ناجح بتحقيق تقاسم السلطة بين الحاكمين وفاشل بتحقيق مصالح الناس ومش قابل للحياة بالنسبة إلهم #كلن_يعن_كلن #لبنان_ينتقض

25 تشرين الأول 2019:

بال2007 2008 لما كنا ننزل نعتصم، كانت السلطة الطائفية تغنّجنا وتنبسط فينا وتضحكلنا ... وبالمخفي تضحك علينا!

بال 2011 2012 ضلت مبسوطة فينا، بس صارت تنزل معنا لإنو شافتنا ملايكة كل الناس بتحبنا ... وبالمخفي جربت تستغل تحراكاتنا وتخترقها

بال 2014 و2015 بلشنا نزعج السلطة ونخوفها، شي تسكير طرقات عالنواب لي بدهم يمددوا، شي مظاهرات كبيرة وضغط نفسي عليها... وبالمخفي كانت عم تبعتلنا شبيحة تا يكسرونا

هلق بال2019 الشعب راعب السلطة الطائفية الفاسدة وهي مخبيي راسها بالرمل وناطرة... وبالمخفي عم تمد إيدها من تحت التراب تا تسترد جماهير كانت بيوم من الايام تدور بفلكها
الشعب وعي وعم يصير مارد... والسلطة بعدها عم تتعامل معو كطفل لازم يتسكّت أو ينضرب كفوف #الشعب_ينتقض #كلن_يعني_كلن

26 تشرين الأول 2019:

كل موجوع بعد ما نزل عالأرض، اليوم لما إجت الفرصة، تا يقول "لا" بوجه كل النهب لي صار بالبلد من زمان لهلق، لا يُعَوَّل عليه !

كل مقرُوط بعدو مفكر إنو يلي قارطو الزعيم التاني مش زعيمو، ومصدق إنو زعيمو عم يحارب الفساد، لا يُعَوَّل عليه !

كل حدا بعدو متوقع إنو القوى الطائفية الحاكمة رح تعمل إصلاح لما يُوقف الضغط الشعبي والمظاهرات وتسكير الطرقات، لا يُعوّل عليه !#كلن_يعني_كلن #الشعب_ينتفض

27 تشرين الأول 2019:

آخر شي كنت بتوقعه بعد حراك مطلبي معيشي كبير، إسمع ناس همها الوحيد تركض على المقابلات التلفيزيونية تا تستنكر "مين سب مين"، وتنسى تحكي عن همومها ومطالبها كرمال "مين سب مين"، وتخوّف الناس من النزلة على الارض عا خلفية "مين سب مين"!
من المُقزِز للفقراء وللمظلومين بهالبلد ينطفي بالآخر هيك حراك "حلم" خارق للمناطق وللطوايف، بعبارة "مين سب مين"!! #لبنان_ينتفض #كلن_يعني_كلن

29 تشرين الأول 2019:

29 تشرين الأول 2019 كربلاء لبنان

3 تشرين الثاني 2019:

اليوم الساعة 4 برياض الصلح وبساحة الشهداء لجميع المقتنعين بضرورة استمرار الحراك #لبنان_ينتفض #كلن_يعني_كلن

7 تشرين الثاني 2019:

أول مرة حدا بِحُطّلي علم لبنان عا واجهة السيارة وما بقلو "شيلو الله يخليك!"

... بعد 17 تشرين صرت عم شوف علم لبنان حلو ولذيذ وبِعبّر عنّي، وبيعكُس لبنان "المواطنة" مش لبنان التطييف والأحزاب الطائفيّة.

حلو التغيير #لبنان_ينتفض #كلن_يعني_كلن

11 تشرين الثاني 2019:

تحية حُب.. مِن الذاكرة القريبة.. للشباب والصبايا لـِ نزلوا تحت الشتي لأول مرة من 8 سنين بأول مظاهرة من مظاهرات حراك إسقاط النظام الطائفي يوم 27 شباط 2011.
... كل ما إتلاقى بـِ حدا منهم بالساحات من 26 يوم حتى اليوم، بلمح فرحة كبيرة صادقة لا تُوصَف. #كلن_يعني_كلن #لبنان_ينتفض

19 تشرين الثاني 2019:

تحية لكل ثائر وثائرة شاركوا اليوم أمام مجلس النواب بالتحرك ورفضوا إنو النواب يفرضوا عليه أجندتهم الخاصة #كلن_يعني_كلن #لبنان_ينتفض #ثورة_17_تشرين

26 تشرين الثاني 2019:

تحية لثوار #بعلبك... تحية لثوار #صور... تحية لثوار #بيروت و #طرابلس ولكل الصامدين بالمناطق بوجه تَعَفُّن النظام الطائفي ورُمُوزه ...

هودي الثوار عم يعيدوا اليوم إحياء مُواطنية مَوّتتها الطبقة السياسية بلبنان، وبعدها عم تموتها من أكتر من 30 سنة لليوم! #لبنان_ينتفض #كلن_يعني_كلن #ثورة_لبنان

29 تشرين الثاني 2019:

مش #الثورة لي دهورت أسرع الوضع الاقتصادي...

.. يلي دهورها هو الطبقة السياسية الجشعة، يلي حاولت بوقاحة، من خلال الحكومة تضبضب فسادها وتغطيه بموازنة بتزيد الضرايب على ذوي الدخل المحدود والفقرا، وما تحط ضرايب عا مصادر الهدر لي هي سببها، وظنِّت إنو الناس رح تضلها نايمة.

هيك بلش التدهور السريع. وما بلش لما الناس طفح كيلها من عنجهية السلطة وفسادها وقرفها

#لبنان_ينتفض #كلن_يعني_كلن

2 كانون الأول 2019:

من أكتر من 10 سنوات بلشت مسيرة جماعية لبناء حركة مدنية سياسية خارج اصطفاف 14 و8 آذار، بس بوقتها كانت الخطابات المحتدمة بين الطبقة السياسية ترجع تخلي الصبايا والشباب المدني مرّات يميلوا مع موقف هالزعيم أو هالزعيم بسبب غياب الصوت البديل.

ورغم إنو الصورة اتغيرت اليوم والمناعة كبرت والبديل بلش يتكون، بس بعدو "بقايا الاصطفاف" مبين بوجوه بعض الناشطين بـ مُبررات مختلفة.

نحنا بحاجة نحيِّد الحراك "المدني" اليوم بشكل حاسم عن بقايا رموز هالاصطفاف، وأملنا بالجيل الجديد المدني يترجم هالحيادية على الأرض أكتر وأكتر تا يفتح باب التغيير بلبنان على مصرعيه.

 #لبنان_ينتفض #كلن_يعني_كلن

سلطة بنظر #مواطن Authority in the eyes of a citizen

سلطة بنظر #مواطن 
Authority in the eyes of a citizen
كاريكاتير باسل عبدالله Bassel Abdallah Caricature

نعم للزواج المدني في لبنان

منذ سنوات، وإثر اختيار السيدة #ريا_الحسن لمسؤولية وزارة المالية، أخبرني المطران #غريغوار_حداد، بأن الوزيرة الجديدة من خيرة السيدات المؤمنات بالمواطنة والناشطات من أجل حقوق الإنسان، ويا ليتها اختيرت في وزارة على تماس أكبر مع حقوق الناس.

وبعد تعيين السيدة الحسن في وزارة الداخلية، استبشرنا خيراً رغم "نقزتنا" الدائمة من الخلفية السياسية لمعظم وزراء الحكومة الجديدة. المهم أنّ بعض الناشطين المُتحمسين اقترحوا أن نزورها بغية تحريك موضوع الزيجات المدنية التي عُقِدَتْ في لبنان والتي أوقفَ اجراءاتها الوزير السابق. لكن الوزيرة الحسن سبقتنا وأثارت موضوع الزواج المدني من باب التأييد.

اعترفت #الدولة_اللبنانية بـ #الزواج_المدني أصلاً من خلال تسجيلها آلاف الزيجات المعقودة مدنياً في الخارج، وبالتالي فإنّ إقراره أمر بديهي. كما أننا نتكلم عن زواج مدني اختيار لا يمنع الزواج ديني، فمما الخوف؟ 

نحن أمام تقصير غير مبرر من الدولة في تأمين زواج المواطنين مدنياً في لبنان، ولا ننتظر أبداً منّة من دولتنا، بل نطالبها بحق. وإلى حين إقرار قانون للزواج المدني في لبنان، ينبغي رفع الحظر عن الزيجات المدنية التي عُقدت في لبنان، ودعُوا الناس تختار حياتها ومستقبلها وانتماءها المواطني التي عجزت الدولة عن تأمينها لها!

#نعم_للزواج_المدني